حالىق جازۋشىسى, مەملەكەتتىك سىيلىقتىڭ يەگەرى فاريزا وڭعارسىنوۆانىڭ ومىردەن وزعانىنا بۇگىن ءتورت جىلدىڭ ءجۇزى اۋدى.
اقىننىڭ تۋعان جەرى اتىراۋدا پوەزيا پاديشاسىنىڭ ادەبي مۇراسىن ناسيحاتتاۋعا ارنالعان شارالار ءجيى ۇيىمداستىرىلادى. 2016 جىلى وبلىس ورتالىعىندا ەڭسەلى ەسكەرتكىش ورناتىلدى. وڭىردەگى ونەرلى جاستاردىڭ باسىن قوسقان «فاريزا جۇلدىزدارى» جاس اقىندار كلۋبى قۇرىلدى. ع.سلانوۆ اتىنداعى وبلىستىق عىلىمي-امبەباپ كىتاپحاناسىندا, نازارباەۆ زياتكەرلىك مەكتەبىندە «فاريزا وڭعارسىنوۆا كابينەتى» اشىلدى. اقىن وقىعان ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە مەموريالدىق تاقتا ورناتىلدى. وبلىستاعى مادەنيەت مەكەمەلەرى مەن ءبىلىم بەرۋ ۇيىمدارىندا پوەزيا پاديشاسىنىڭ رۋحىنا ارنالعان شارالار ءوتىپ تۇرادى. مۇنىڭ ءبارى تۋعان جەرىنىڭ ارداقتى پەرزەنتىنە دەگەن قۇرمەت-ىقىلاسى.
-«فاريزا جۇلدىزدارى» كلۋبىنىڭ مۇشەلەرى رەسپۋبليكالىق ادەبي بايقاۋلاردا جۇلدەگەر اتاندى. شىعارمالارى باسىلىم بەتتەرىندە جاريالانىپ ءجۇر. بيىل اتىراۋ جاس اقىندارىنىڭ انتولوگياسىن شىعارۋ, كەشتەرىن وتكىزۋ جوسپاردا بار. كلۋبتىڭ ماقساتى فاريزا وڭعارسىنوۆانىڭ شىعارماشىلىعىن ناسيحاتتاپ قانا قويماي, اتىراۋلىق جاس تالانتتارعا قولداۋ كورسەتۋ, قانات ءبىتىرۋ. كىتاپحاناداعى «فاريزا وڭعارسىنوۆا كابينەتى» شىعارماشىلىقپەن اينالىساتىن جاستاردىڭ باسىن قوساتىن, كەزدەسۋلەر ۇيىمداستىراتىن, اتىراۋعا كەلگەن زيالى قاۋىم وكىلدەرى ارنايى ات باسىن بۇراتىن قۇتحاناعا اينالدى. وسى باعىتتاعى جۇمىستارىمىز بيىل دا جالعاسادى. ماحامبەت اتىنداعى وبلىستىق قازاق دراما تەاترىمەن بىرلەسىپ اقىن شىعارماشىلىعىنا ارنالعان ميۋزيكل دايىنداۋدى ويلاپ وتىرمىز - دەيدى كلۋب جەتەكشىسى, اقىن ءاليا داۋلەتباەۆا.
اقىننىڭ دۇنيەدەن وزعان كۇنىندە ايماقتاعى زيالى قاۋىم وكىلدەرى مەن جاستار ەسكەرتكىشكە گۇل شوقتارىن قويىپ, ولەڭدەرىن وقىدى, ەستەلىكتەر ايتتى. بۇل ءۇردىستىڭ داستۇرگە اينالىپ كەلە جاتقانى دا «جوعالمايمىن, جوقتاۋشى حالقىم باردا» دەگەن اقىن جىرىنىڭ اقيقاتقا اينالعانىنىڭ ايعاعى.
باقىتگۇل باباش, «ەگەمەن قازاقستان»